تۇڭعىش پرەزيدەنت ساياباعىندا الماتىنىڭ تۋعان كۇنى اتاپ ءوتىلدى. مەرەكەنىڭ "تۇزدىعىن" ءداستۇرلى "Alma Fest" الما فەستيۆالى كەلتىردى، دەپ جازادى Qamshy.kz اقپارات اگەنتتىگى قالالىق اكىمدىكتىڭ باسپا ءسوز قىزمەتىنىڭ دەرەگىن نەگىز ەتىپ.

الماتىلىقتاردى قالا كۇنىمەن قۇتتىقتاعان مەگاپوليس باسشىسى ءوز سوزىندە ەلباسىنىڭ "ۇلى دالانىڭ جەتى قىرى" اتتى ماقالاسىندا الماتىنى ەڭ ادەمى قالالاردىڭ بىرىنە تەڭەيتىنىن تىلگە تيەك ەتتى.

"ىلە الاتاۋى الەمگە شىعۋ تاريحى مىڭجىلدىققا جەتكەن الما مەن قىزعالداقتى پاش ەتتى. الماتىنىڭ دا كوپعاسىرلىق تاريحى بار، – دەدى شاھار باسشىسى. سونداي-اق، قالا اكىمىنىڭ ايتۋىنشا، الماتى – تاۋەلسىزدىكتىڭ التىن بەسىگى ءارى قارقىندى دامىپ كەلە جاتقان مەگاپوليس. وعان قوسا عىلىم مەن ءبىلىمنىڭ، مادەنيەت پەن ونەردىڭ، قارجى، تۋريستىك جانە سپورت ورتالىعى. "سۇيىكتى الماتىمىز – جاستىقتىڭ، دارىندىلار مەن سۇلۋلىقتىڭ، مەيىرىمدىلىكتىڭ قالاسى. بۇل – ارماندار ورىندالاتىن قالا! سول سەبەپتى الماتىنىڭ بولاشاعى زور. شىن جۇرەكتەن الماتى مەن الماتىلىقتارعا دەنساۋلىق پەن تابىس تىلەيمىن! – دەدى ب.ساعىنتايەۆ.

مەرەكەنىڭ باعدارلاماسى مازمۇندى. ساياباق اۋماعى ءبىرقاتار تاقىرىپتىق ايماقتارعا بولىنگەن. اشىق اسپان استىنداعى زاماناۋي ونەر ايماعى ءوز الدىنا ءبىر توبە. ال "الما Bazar" جارمەڭكەسىنەن بارلىق سۇرىپتاعى المانى ساتىپ الۋعا بولادى. "الما Master" قولونەرشىلەر جارمەڭكەسى دە ۇيىمداستىرىلدى. "الما Fashion" ءسان جانە ستيل ايماعى مەن بەلسەندىلەرگە ارنالعان "الما Drive" سپورت الاڭى جۇمىس ىستەپ تۇر. ال وتباسىلىق دەمالۋشىلارعا ارنالعان "الما وتباسى" ايماعىنداعى شەبەرلىك سىنىپتار مەن ويىن-ساۋىق باعدارلاماسى تاپتىرماس ورتانىڭ ءبىرى.

بارلىق قوناقتار ءۇشىن "الما Auen" مۋزىكالىق كونسەرتتىك باعدارلاماسى دايىندالدى. جىل سايىن قالا كۇنى مەرەكەسىندە تۇڭعىش پرەزيدەنت پاركىنە 300 مىڭعا جۋىق تۇرعىن كەلەدى. باقشا شارۋاشىلىعى دا ءتۇرلى سۇرىپتاعى 100 مىڭ توننا الما اكەلدى.